Fevralın 12-də Naxçıvan Muxtar Respublikası Prokurorluğunun təşkilatçılığı ilə Naxçıvan Muxtar Respublikası Daxili İşlər Nazirliyi, Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin və Naxçıvan Dövlət Universitetinin aidiyyəti əməkdaşları ilə birgə Kəngərli Rayon İcra Hakimiyyətində “Yetkinlik yaşına çatmayanlar və ailə münasibətləri əleyhinə olan hüquqpozmalar və onların profilaktikası” mövzusunda maarifləndirici tədbir keçirilib.

Tədbiri Kəngərli Rayon İcra Hakimiyyəti aparatının Hüquq şöbəsinin müdiri Rəşad Həsənzadə açaraq, mövzunun aktuallığı və əhəmiyyətindən danışıb.

Daha sonra Naxçıvan Muxtar Respublikası Prokurorluğunun Hüquqi təminat və insan hüquqları məsələləri şöbəsinin rəisi baş ədliyyə müşaviri Faiq Səfərov, Naxçıvan Muxtar Respublikası Daxili İşlər Nazirliyinin əməkdaşı Samiq Məmmədov, Naxçıvan Muxtar Respublikası Səhiyyə Nazilriyinin əməkdaşı Nigar Səfərova, Ailə, Qadın və Uşaq Problemləri üzrə Dövlət Komitəsinin əməkdaşı Firuzə Hüseynova və Naxçıvan Dövlət Universitetinin əməkdaşı Nuranə Səlimova çıxış edərək, mövzu ilə bağlı ətraflı məlumat veriblər.

Çıxışlarda vurğulanıb ki, yetkinlik yaşına çatmayanların hüquq pozuntularının qarşısının alınması, bu halların yaranmasına səbəb olan amillərin aradan qaldırılması, onların hüquq və qanuni mənafelərinin qorunması vacibdir. Həmçinin, yetkinlik yaşına çatmayanların cinayətkar fəaliyyətə cəlb olunmasının qarşısının alınması və erkən nikah hallarının qarşısının alınması istiqamətində maarifləndirmə işlərinin mühüm rolu olduğu qeyd edilib.

Sonda iştirakçıların mövzu ilə bağlı sualları cavablandırılıb.