Dövlət başçısı çıxışında Qarabağın bərpasına göstərilən dəstəyə görə Türkmənistan tərəfinə, eləcə də Arkadağ Qurbanqulu Məlikquliyeviç Berdiməhəmmədova təşəkkürünü bildirib. Prezident qeyd edib ki, Qurbanqulu Berdiməhəmmədov ötən ilin iyul ayında Azərbaycana səfəri zamanı Füzuli şəhərində məscid tikintisi təşəbbüsü ilə çıxış edib və hazırda həmin məscidin inşasına başlanılıb. İlham Əliyev bunu Türkmənistanın və qardaş Türkmən xalqının Azərbaycana olan dostluq və qardaşlıq münasibətinin daha bir təzahürü kimi dəyərləndirib.

Prezident İlham Əliyev Türkmənistan Prezidenti Sərdar Qurbanquluyeviçə də əməkdaşlığa görə minnətdarlığını ifadə edərək bildirib ki, görüş zamanı bir çox məsələlər ətrafında geniş fikir mübadiləsi aparılıb, aidiyyəti qurumlara konkret tapşırıqlar verilib. Dövlət başçısı əminliyini ifadə edib ki, gələn ay Türkmənistanda keçiriləcək Hökumətlərarası Komissiyanın iclasına qədər verilən tapşırıqlar hərtərəfli işlənəcək və tərəflər yeni layihələrin həyata keçirilməsi, eləcə də birgə problemlərin həlli istiqamətində növbəti mərhələyə qədəm qoyacaqlar.

Dövlət başçısı vurğulayıb ki, Azərbaycan-Türkmənistan münasibətləri möhkəm tarixi köklər, ortaq mədəniyyət və mənəvi dəyərlər üzərində formalaşıb. O qeyd edib ki, hər iki ölkədə mütəmadi olaraq mədəni tədbirlər keçirilir, yaradıcı kollektivlərin qarşılıqlı səfərləri təşkil olunur. Bu ayın əvvəlində Aşqabadda və Arkadağ şəhərində Azərbaycan Mədəniyyəti Günlərinin keçirildiyini xatırladan Prezident, ötən il isə Türkmənistanın mədəniyyət xadimlərinin Bakı və Gəncədə təşkil olunan Mədəniyyət Günlərində iştirak etdiklərini diqqətə çatdırıb.

İlham Əliyev həmçinin Bakı və Aşqabadın, eləcə də Füzuli və Arkadağ şəhərlərinin qardaş şəhərlər olduğunu bildirərək, bütün bunların xalqlar arasında birliyin və qarşılıqlı etimadın göstəricisi olduğunu qeyd edib. Prezident vurğulayıb ki, tərəflər əməkdaşlığı daha da genişləndirməyə və münasibətləri konkret məzmunla zənginləşdirməyə çalışırlar.

Prezident İlham Əliyev Türkmənistan tərəfinə Azərbaycanın Mərkəzi Asiya Dövlət Başçılarının Məşvərət Şurasına tamhüquqlu üzv qəbul olunması məsələsində göstərdiyi dəstəyə görə də təşəkkürünü bildirib. Dövlət başçısı bunu tarixi hadisə kimi dəyərləndirərək qeyd edib ki, Azərbaycan coğrafi baxımdan Mərkəzi Asiyanın bir hissəsi olmasa da, tarixi, mədəni və mənəvi bağlar, eləcə də nəqliyyat-logistika sahəsində həyata keçirilən birgə layihələr böyük Mərkəzi Asiya məkanının vahid geosiyasi və geoiqtisadi bölgə kimi formalaşmasına xidmət edir.

Çıxışında nəqliyyat və logistika sahəsində əməkdaşlığın əhəmiyyətinə də toxunan Prezident İlham Əliyev bildirib ki, bu sahədə əməkdaşlıq artıq uzunmüddətli və strateji xarakter daşıyır. O vurğulayıb ki, müasir dövrdə etibarlı və təhlükəsiz nəqliyyat marşrutlarının sayı çox deyil və bu baxımdan Azərbaycanla Türkmənistan arasında qurulan əməkdaşlıq xüsusi əhəmiyyət kəsb edir. Prezident qeyd edib ki, nəqliyyat və logistika layihələrini siyasi münasibətlərdən ayrı təsəvvür etmək mümkün deyil və məhz siyasi qarşılıqlı etimad ölkələrin səylərini birləşdirməyə imkan verir.

İlham Əliyev bildirib ki, tərəflər artan yük axınlarının daha da artırılması və üçüncü ölkələrdən yükdaşımaların cəlb edilməsi üçün nəqliyyat və logistika sahəsində fəaliyyətlərini daha sıx əlaqələndirmək barədə razılığa gəliblər. O əlavə edib ki, bu istiqamət həm ikitərəfli, həm də çoxtərəfli əməkdaşlığın prioritet sahələrindən biri olacaq.

Dövlət başçısı çıxışının sonunda Türkmənistanın beynəlxalq uğurlarını yüksək qiymətləndirərək bildirib ki, Azərbaycan qardaş ölkənin əldə etdiyi nailiyyətlərə həmişə sevinir. O qeyd edib ki, Türkmənistan və Azərbaycan zəngin enerji ehtiyatlarına malik ölkələrdir və bu sahədə də əməkdaşlığın genişləndirilməsi üçün böyük imkanlar mövcuddur.

Prezident İlham Əliyev həmçinin Türkmənistanın sosial-iqtisadi inkişaf sahəsində əldə etdiyi mühüm nailiyyətləri yüksək qiymətləndirərək, ölkənin şəhərlərinin, infrastrukturunun və turizm potensialının sürətlə inkişaf etdiyini vurğulayıb. Dövlət başçısı bütün bunların Türkmənistan rəhbərliyinin uzaqgörən siyasətinin və milli maraqlara söykənən inkişaf modelinin nəticəsi olduğunu bildirib.

Sonda Prezident İlham Əliyev Azərbaycanın Türkmənistanın beynəlxalq arenada qazandığı uğurları və ölkənin neytrallıq siyasətini hər zaman dəstəklədiyini, bundan sonra da bu dəstəyin davam etdiriləcəyini diqqətə çatdırıb.