Prezident İlham Əliyev 3 noyabr 2025-ci ildə Azərbaycan Milli Elmlər Akademiyasının 80 illik yubileyində çıxış edərək qeyd edib ki, Azərbaycan alimləri bundan sonra da ölkənin davamlı inkişafına mühüm töhfələr verəcəklər.

O bildirib ki, Akademiya 80 il ərzində böyük inkişaf yolu keçərək, elmin formalaşmasında əsas rol oynayıb. Ötən əsrin 70-ci illərində Ulu Öndər Heydər Əliyevin rəhbərliyi ilə Akademiyanın fəaliyyəti təkmilləşdirilib, bir neçə yeni elmi-tədqiqat institutu yaradılıb və elmin inkişafına ciddi maliyyə dəstəyi göstərilib. Həmin dövrdə yüz minlərlə gəncin Sovet İttifaqının nüfuzlu ali məktəblərində təhsil alması ölkənin intellektual potensialını gücləndirib.

Prezident vurğulayıb ki, müstəqilliyin ilk illərində ölkə ağır sınaqlarla üzləşsə də, məhz Heydər Əliyevin qətiyyəti və uzaqgörənliyi sayəsində Azərbaycan bu çətinlikləri dəf edə bilib. Onun 1993-cü ildə hakimiyyətə qayıtdıqdan sonra ziyalılarla ilk görüşünün AMEA-da keçirilməsi elmin dövlət üçün prioritet olduğunu göstərib.

İlham Əliyev həmçinin son on ildə elmə ayrılan vəsaitin iki dəfədən çox artdığını, Akademiyanın maddi-texniki bazasının gücləndirildiyini, yeni elmi-tədqiqat və tədris infrastrukturunun yaradıldığını qeyd edib. O, vurğulayıb ki, elmin inkişafı istiqamətində həyata keçirilən bütün tədbirlər Heydər Əliyev siyasətinin davamıdır və bu siyasət bu gün yeni məzmunla zənginləşərək uğurla həyata keçirilir.